बाँसबारी क्लव फराकिलो गोल अन्तरले पराजित « News from Nepal as it happens

बाँसबारी क्लव फराकिलो गोल अन्तरले पराजित

काठमाडौं,पुष १५ । राजधानीमा जारी सहिद स्मारक ए डिभिजन लिग फुटबलको दोस्रो खेलमा बाँसबारी क्लवलाई ६–० को फराकिलो गोल अन्तरले पराजित गर्दै थ्रीस्टार क्लवले अंक तालिकाको शीर्ष स्थान कायम राखेको छ । दशरथ रंगशालामा आइतबार भएको दोस्रो खेलमा थ्रीस्टारलाई जिताउन कप्तान सन्तोष साहुखल, विदेशी खेलाडी फेमी जोसुवा र विजय गुरुङले समान २-२ गोल गरे । पहिलो हाफमा दुइ गोल गरेको थ्रीस्टारले दोस्रो हाफमा भने लगातार चार गोल गरेको छ । कप्तान सन्तोष साहरखलले खेल सुरु भएको ३१ औं मिनेटमा गोल गर्दै टीमलाई अग्रता दिलाएका थिए । पहिलो हाफको इन्जुरी टाइममा गोल गर्दै फेमीले अग्रतालाई दोब्बर पारे । दोस्रो हाफको दोस्रो मिनेटमैं विजय गुरुङले अग्रतालाई तेब्बर पारेका थिए । ६८ औं मिनेटमा फेमीले व्यक्तिगत दोस्रो गोल गरे । ७३ औं मिनेटमा सन्तोषले व्यक्तिगत दोस्रो गोल गरे भने ८४ औं मिनेटमा विजय गुरुङले गरेको गोलसँगै थ्रीस्टारले ६–० को जित दर्ता गर्न सफल भयो । थ्रीस्टारका अगाडी निरिह देखिएको बाँसबारीले भने निरन्तर गोल खाइरह्यो तर फर्काउन सकेन । यो जितसँगै थ्रीस्टार २५ अंकका साथ लिग तालिकाको शीर्ष स्थानलाई जोगाएको छ । १० खेल खेलेको थ्रीस्टार ८ खेलमा जित, १ मा बराबरी र १ मा हार व्यहोरेको छ भने समान खेलबाट १ मा जित र २ मा बराबरी गरेको बाँसबारी ५ अंकका साथ १५ औं स्थानमा छ ।