अपडेट: पत्रकार डेकेन्द्रराज थापाको हत्या प्रकरण

दैलेख,पुष २९ । दैलेखका पत्रकार डेकेन्द्र थापा हत्या प्रकरणमा भईरहेको कानूनी कारवाहीमा प्रधानमन्त्री डा बाबुराम भट्टराईले ठाडो हस्तक्षेप गरेपछि स्थलगत भ्रमणमा रहेको नेपाल पत्रकार महासंघको मिशन टोलीले आइतबारदेखि अध्ययन सुरु गरेको छ । महासंघका अध्यक्ष शिव गाउँलेको नेतृत्वमा पुगेको टोलीले पीडित पत्रकारका परिवार, स्थानीय पत्रकार, प्रशासन, नागरिक समाज, राजनीतिक दललगायतसँग छलफल गरी यथार्थ विवरण लिने प्रक्रिया थालेको हो । टोलीमा महासंघका सल्लाहकार पोषण केसी, केन्द्रीय सदस्य सूर्यमणि गौतमलगायत रहेका छन् । महासंघको टोली पुग्नासाथ दैलेखमा पत्रकार थापाको हत्याका आरोपीहरुसँग अहिलेसम्म लिईएको बयान र प्रमाणहरु नष्ट गर्न सरकारले दिएको आदेशको विरोधमा ब्यापक जनप्रदर्शन भएको छ ।

भिडियो हेर्न को लागि यहाँ क्लिक गर्नुहोला
Click Here For Video

प्रदर्शनमा ठूलो संख्यामा नागरिक समाजका अगुवा, पत्रकार, विभिन्न पेशा, वर्ग र क्षेत्रका ब्यक्तित्व तथा सर्वसाधारण सहभागी थिए । प्रदर्शनमा सहभागीहरुले अनुसन्धान स्थगन गर्न र प्रमाण नष्ट गर्न सरकारले दिएको आदेशको विरोध गर्दै दोषीलाई कारवाही गर्न माग गरेका थिए । प्रदर्शनपछि सभालाई सम्बोधन गर्दै महासंघका अध्यक्ष शिव गाउँलेले अनुसन्धान रोक्न दबाब दिने प्रधानमन्त्री भट्टराई र महान्यायाधिवक्ता मुक्ति प्रधानविरुद्ध सर्वोच्चमा रिट दायर गर्ने बताए । उनले सरकारले जतिसुकै दबाब दिएपनि न्यायको लडाइ नरोकिने पनि बताए । यसअघि प्रधानमन्त्री बाबुराम भट्टराईका सरकारी कानूनी सल्लाहकार महान्यायाधिवक्ता मुक्ति प्रधानले जिल्ला न्यायाधिवक्तालाई प्रमाण नष्ट गर्न दबाब दिएका थिए । जसका कारण अहिलेसम्म संकलित बयान र प्रमाण नै नष्ट हुने खतरा बढेको छ । महान्यायाधिवक्ता प्रधानले सबैखाले कानूनी प्रक्रिया रोक्न लिखित आदेश नै दिएपछि दैलेखस्थित सरकारी वकिलको कार्यालयले बयान नै रोकेको छ । पत्रकार थापाको हत्यामा संलग्नहरुलाई बचाउन सरकारले गरिरहेको षडयन्त्रबारे छानविन गर्न काठमाडौबाट मानवअधिकारकर्मीको ६ सदस्यीय टोली पनि दैलेख पुगेको छ ।