बन्यजन्तु मारेको अभियोग लागेका पूर्व सहायक रथी जेल चलान

परासी, असार ३० । जिल्ला प्रशासन कार्यालय नवलपरासीले नेपाली सेनाका पूर्व सहायक रथी सागर शमशेर जबरालाई पुर्पक्षका लागि थुनामा राख्न कारागार चलान गरेको छ ।  शिकार गरेर रतुवा मृग मारेको अभियोगमा पक्राउ परेका पूर्व सहायक रथी जबरालाई  चलान गरेको हो ।

गत जेठ ३१ गते चितवन राष्ट्रिय निकुञ्ज अन्र्तगत पर्ने नवलपरासी स्थित नमूना मध्यवर्ती सामुदायिक वनमा शिकार खेलेर भाले मृग मारेर लैजाँदै गरेको अवस्थामा उनी सहित तिन जनालाई स्थानियवासीले पक्राउ गरी निकुञ्जको जिम्मा लगाएका थिए ।

आवश्यक अनुसन्धान पछि निकुञ्जले छाडे पनि हातहतियार सम्बन्धी भन्दै प्रहरीले साता दिन अघि जवरालाई पक्राउ गरेको थियो । पक्राउ परेका ललितपुर कुपण्डोल निवासी ७० बर्षीय जवरालाई जिल्ला प्रशासन कार्यालयले खरखजना ऐन अन्र्तगत पुर्पक्षका लागि कारागार चलान गरिएको हो । मृग मारेको बखत प्रयोग भएको गोलीको इजाजत नभएको भन्ने अनुसन्धानमा देखिएपछि उनीमाथि खरखजना ऐन अन्र्तगत मुद्धा चलाईएको छ । जवरा माथि १ वर्ष देखि ३ वर्ष जेल सजायको माग सहित सरकारी वकिलको कार्यालयले अभियोग पत्र दर्ता गरेको छ । नेपाली सेनाका पूर्व सहायक रथी सहित सेनाका  पूर्व सुवेदार सिताराम कार्की र  नवलपरासीको बज्रदल गण डण्डामा कार्यरत क्याप्टेन कुलदिप कुँवरलाई स्थानीयवासीले पक्राउ गरेका थिए ।